43 Individu Di Bau Nerima Setipikit Diaku Status Bumiputera Sarawak
Disiarkan pada 14 Sep 2024
Sumber Berita: UKAS
BAU: Bisi 43 individu ari Pelilih Bau udah nerima setipikit diaku status nyadi Bumiputera Sarawak, lalu ngujungka semua penyampau manggai 85 setipikit dikeluar nengah Opis Pelilih Bau naka diatu.
Sapit Menteri Pengangkut Sarawak (Sungai enggau Tasik) ke mega Kaban Kunsil Nengeri (ADUN) Tasik Biru, Dato Henry Harry Jinep, meri besai terima kasih ngagai perintah nengeri, kelebih agi pentadbiran Opis Pelilih Bau, ke udah chakah mutar isu status diaku nyadi Bumiputera.
“Kitai chukup beterima kasih laban mayuh isu diaku status Bumiputera ulih diputar nengah perintah nengeri, kelebih agi nengah Opis Pelilih Bau,” ku iya.
Iya madah baru, ba pengawa sekali tu, sida udah ngangau Presiden Serakup Dayak Bidayuh Nasional (DBNA), Datu Ik Pahon, nyuaka setipikit ngari ke raban perintah nyadi kelai sida diterima nyadi bansa Bidayuh.
Iya madah munyi nya ba aum media sepengudah bejadika Pengawa Nyuaka Setipikit Diaku Status Bumiputera Sarawak di Kompleks Opis Pelilih Bau, kena Hari Lima tu tadi.
Udah nya, Dato Henry mantangka jaku pemesai guna setipikit nya ungkup peminta bala dudi hari, kelebih agi ba sukut hak ngempu tanah NCR kelimpah ngasai bemacham perengka guna ke diungkupka ngagai Bumiputera. - EDISI UKAS
