MULU: Perintah Sarawak semampai siru ke rayat menua pesisir alai sida diberi projek Program Transformasyen Menua Pesisir (RTP) enggau Projek Mit Menua Pesisir (MRP).
Sapit Menteri ba Opis Premier Sarawak (Orang Gawa, Imigresen enggau Matau Projek) Datuk Gerawat Gala madah, tu nyengkaum Perintah Sarawak ti semampai nyaup rayat ngentak rumah panjai baru.
“Agih RTP enggau MRP udah diagih ngagai pengari rayat dikena ngemansangka sitak pegai sida.
“Taja pia, penyampau agih nya enda ulih terus diberi tang diberi enggau chara berenggat nitihka pematut,” ku iya.
Iya nerangka pekara nya maya Pengawa Nasih Taba Rumah Panjai Baru Rumah Billy di Kampung Engkaras ditu, Hari Dua.
Kaban Kunsil Nengeri (ADUN) Mulu nya mega madah, ba menua Puyut Lubuk Nibung aja bisi 22 iti projek ngaga rumah panjai baru nyengkaum 10 buah rumah panjai udah tembu digaga.
“Semua tu dibantu Perintah Sarawak nengah agih ke diberi ngagai pengari rayat konstitusyen Mulu dikena nyaup ngelempungka belanja rayat ngentak rumah panjai baru,” ku iya.
Datuk Gerawat mega ngarapka peranak menua nya ulih meri sukung enggau kerejasama ti tegap ngagai Tuai Rumah awakka atur rumah panjai sida ulih dipejalaika enggau manah.
Iya mega ngelalau peranak rumah panjai nya semampai nitihka adat bansa Iban maya ngentak rumah panjai baru awakka sida ulih diau dia enggau lantang.
Sama bela datai maya nya, Sekretari Politik ngagai Premier Sarawak Dominic Nyurang, Pemangku Pegawai Pelilih Marudi Rose Edward Tarang, Chairman Opis Kaunsil Pelilih Marudi Kaunselor Edward Mendai sereta bala Tuai Raban Bansa enggau Genturung Pendiau (KMKK). -EDISI UKAS
