Penumbuh Mengeri Pintar Sarawak Begunaka Chara Ti Holistik
Disiarkan pada 11 Sep 2024
Sumber Berita: UKAS
KUCHING: Pemujur numbuh Smart City tauka Mengeri Pintar begunaka kerejasama tegap ari agensi perintah enggau opis bekuasa menua di nengeri tu.
Sapit Premier Sarawak Datuk Amar Prof Dr Sim Kui Hian madah, chara holistik ari sukut "top-down" dikena nentuka rayat Sarawak bela ampit pemansang mengeri pintar, ti ukai semina nyadi ba sitak tauka pelilih aja.
Ku iya, entara pelilih enda agi nekul pejalai rayat Sarawak ke diatu sepeneka bejalai ngagai sitak bukai dalam nengeri sereta bisi reta ba dini-dini endur.
“Kitai udah ngadu mayuh pengawa ba opis bekuasa menua dalam kandang 10 taun ngelama tu alai tebal agi pengawa nya digaga enggau chara digital.
“Udah maya iya kitai ngaga ekosistem digital ngambik ngemuntangka rayat nemu penerang ari agensi bekaul,” ku iya.
Iya bejaku munyi nya maya Woksyop Mengeri Pintar 2024 ditu, Hari Tiga.
Iya ke mega Menteri Pengerai Mensia Mayuh, Pengawa Berumah enggau Perintah Menua madah, ba pengawa bejadika mengeri pintar, kerejasama agensi beguna laban inisiatif nya enda ulih digaga kediri .
Ku iya, kerejasama nya dikeandal ulih numbuh mengeri pintar ukai semina moden tang mega lantang endur rayat bepun ari pemanah nyediaka servis penerang.
Sama bisi datai maya nya, Unit Perambu Ekonomi Sarawak (EPU) Datu Lesther Mathew, Direktor Sarawak Multimedia Authority (SMA) Dato Dr. Anderson Tiong Ing Heng, Datuk Bandar Kaunsil Bandaraya Kuching Selatan (MBKS) Dato Wee Hong Seng enggau bala pegawai Opis Perintah ke bukai.-EDISI UKAS
