Kerejasama Sarawak-Singapura Ditegap Nengah Kuasa Enggau Dagang
Disiarkan pada 11 Sep 2024
Sumber Berita: UKAS
KUCHING: Kaul kerejasama Sarawak enggau Singapura deka majak ditegap nengah mayuh inisiatif, lebih agi ba kuasa enggau peluang dagang.
Menteri Orang Gawa Singapura, Dr Tan Lee Seng madah, perintah Singapura semampai deka ngerembaika kerejasama ti komprehensif agi dikena ngenegapka agi ekonomi ba dua buah menua.
“Kami mega anda negapka agi kaul menua Singapura enggau Sarawak lebih agi ba bidang kuasa.
“Ukai semina nya, kami benung nyerungkai bemacham inisiatif dikena ngangkatka konektiviti sereta peluang kerejasama dagang ke bukai,” ku iya madah.
Iya madah munyi nya maya dirandau media sepengudah penemuai basa ngagai Yang di-Pertua Negeri Sarawak, Tun Pehin Sri Dr Wan Junaidi Tuanku Ja'afar di Astana Negeri Sarawak ditu, Hari Tiga.
Iya mega madah, tuju penemuai basa nya bekaul kerejasama entara Sarawak enggau Singapura kelimpah meri pengaga ati ngagai Tun Pehin Sri Dr Wan Junaidi ke dipeda siku tuai ti ngembuan penemu ke mayuh ba institusyen di nengeri tu.
Dr Tan See Leng berengkah nemuai gawa di Sarawak sehari tu, lalu diperambu betemu enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg muak ke lemai tu.-EDISI UKAS
