KAPIT: Projek ngadu Sekula Primary (SK) Nanga Oyan deka digaga nengah Langgur Pemansang Malaysia Lumpar Ke-13 (RMK-13) ari Opis Menteri Pelajar.
Kaban Kunsil Nengeri (ADUN) Baleh, Nicholas Kudi Jantai madah, projek sekula lama nya udah dipasukka ba projek RM1 billion tang taja pia enda dipenyadika.
Ketegal nya, iya madahka diri deka minta Kaban Parlimen Hulu Rajang ke mega Sapit Menteri Digital Datuk Wilson Ugak Kumbong nyaup ngaduka sekula nya.
Iya nerangka pekara nya maya nemuai ngagai Rumah Unting, Nanga Sekeroh Tengah, Sungai Oyan ditu, Hari Dua tu tadi.
Bekaul isu rumah panjai bekenaka kuasa solar, iya madah, enti nunda diatu kuasa karan ari mengeri ulih datai di rumah panjai.
Tang ku iya, penanggul nyadi ketegal sida ke beempu tanah enda ngemendarka tanah sida dientak tiang karan tauka minta pampas kelalu besai.
Ba pekara senentang jalai ngelawa rumah panjai di Sungai Sekeroh Tengah, ku iya, jalai ke udah jai nya deka diadu nengah Opis Pelilih Bukit Mabong enggau Opis Kereja Raya (JKR).
Ba program nya mega Nicholas Kudi bisi meri agih belanja enggau semua penyampau RM32,000 ngagai Komiti Pemansang enggau Genturung Pendiau (KMKK) Rumah Umbang, Rumah Jimmy Jaraw, Rumah Unting, Rumah Nulai, Rumah Jana, Rumah Sylvester Jimba enggau SK Nanga Oyan.- EDISI UKAS
