Perintah Sarawak Meranakka Puku Ba STEM Ketegal Deka Nyungkak Pemansang Nengeri
Disiarkan pada 10 Sep 2024
Sumber Berita: UKAS
SIBURAN: Perintah Sarawak enda belampung ati meranakka puku ba bidang Sains, Teknologi, Injiniring enggau Matematik (STEM) dikena nempa komuniti ke ulih ngemasangka nengeri tu.
Menteri Pelajar, Inovasyen enggau Pemansang Pengelandik Sarawak, Dato Sri Roland Sagah madah, pekara dikemeratka ba STEM ukai semina polisi aja tang kunchi pemansang dudi hari Sarawak.
“Perintah Sarawak udah netapka juluk ati ke besai iya nya 60 peratus nembiak sekula ngambi bidang STEM manggai taun 2030.
“Tu besai amat reti ngagai kitai deka bejadika juluk ati nyadi nengeri mansang manggai taun 2030 ti nyadi pemun pengerembai ekonomi enggau teknologi,” ku iya madah.
Iya madah munyi nya ba Pengerami Bejadika Karnival STEM di Sekula Primari (SK) Patung ditu, apin lama ke udah.
Kaban kunsil Nengeri (ADUN) Tarat nya nambah baru, dikena nentuka semua nembiak ngembuan akses ke sama bela ba STEM, perintah nengeri deka nyendiaka makmal sains ba semua pelilih di Sarawak.
“Makmal tu deka meri peneleba ke berega ngagai nembiak ke datai ari menua pesisir laban kitai andal deka meda tiap iku nembiak patut bisi peluang belajar saintifik.
“Aku mega madah makmal sains keterubah digaga ba Curtin Bio-Valley deka dipenyadika bulan September 2024 tu lalu udah nya, bala nembiak ari pelilih Siburan mega deka bisi makmal Sains diri empu,” ku iya nerang baru.
Sama bisi datai maya nya, Sapit Menteri Pelajar, Inovasyen enggau Pemansang Pengelandik Datuk Francis Harden Hollis, Sapit Sekretari Mendam Opis Menteri Pelajar, Inovasyen enggau Pemansang Pengelandik Anielia Siam, Pegawai Opis Pelajar Pelilih Serian Bunsie Tunton enggau Kepala Pengajar SK Patung Yohansone Sika. -EDISI UKAS
