KUCHING: Tun Datuk Patinggi Temenggong Jugah Barieng, siku bansa Dayak tebilang, bela megai pengawa ke besai ngempung menua Sarawak tama ba Serakup Malaysia.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Tun Jugah Barieng siku Iban ti besai amat saup nentuka Malaysia ulih nyadi.

Ku iya, 16 September 1963 nyadi kelai penyerakup bala tuai enggau rayat tiga buah menua ti beserakup nyadi bansa Malaysia.

"Nyau pengelama diumba ulah beserakup bala tuai dulu suba baka Tun Datuk Patinggi Temenggong Jugah ari Sarawak, Tun Datu Mustapha Datu Harun enggau Tun Muhammad Fuad Stephens ari Sabah, penemu numbuhka menua baru ke digaga nama 'Malaysia' mujur dipenyadi, taja maya nya Brunei enda enggau," ku iya madah.

Iya madah munyi nya nengah teks ke dibacha Sapit Premier Sarawak, Datuk Amar Douglas Uggah Embas ngarika iya bejadi Program Ngenang Tuai Menua Tun Datuk Patinggi Temenggong Jugah Barieng ditu, Hari Satu.

Kelimpah ari nya, Datuk Patinggi Abang Zohari muji penajam runding Tun Jugah, taja iya nadai sekula maya jeman pegai perintah Brooke suba.

"Siti pekara ti ngalitka ati iya nya penajam runding Tun Jugah enggau penemu ke dikemuan iya taja ukai datai ari ruang bilik bepelajar tinggi. Iya nemu belajar Jaku Melayu enggau Inggeris begulai enggau orang mayuh," ku iya madah baru.

Iya mega madahka Tun Jugah nyadi Iban keterubah nerima basa ari Perintah British.

Program maya nya disempulang anak Tun Jugah iya nya Tan Sri Datuk Amar Leonard Linggi ke mega Chairman Yayasan Tun Jugah nusi cherita iya.

Bela bisi datai maya nya Menteri Penyerakup Bansa Dato Sri Aaron Ago Dagang, Menteri Kereja Raya Dato Sri Alexander Nanta Linggi, Ex-Sapit Kepala Menteri Datuk Patinggi Tan Sri (Dr.) Alfred Jabu Numpang, bala menteri kabinet Perintah Besai enggau Nengeri sereta bala pemesai ke bukai.-EDISI UKAS