Pengerami Ngintu Hari Keputeraan Rasmi Yang di-Pertuan Agong Ke-17 Renggat Negeri Sarawak Kelai Basa Ngagai Sultan Ibrahim Nyadi Tuai Menua
Disiarkan pada 07 Sep 2024
Sumber Berita: UKAS
KOTA SAMARAHAN: Pengerami Ngintu Hari Keputeraan Rasmi Kebawah Duli Yang Maha Mulia Seri Paduka Baginda Yang di-Pertuan Agong Sultan Ibrahim Renggat Negeri Sarawak dipeda meri diaku enggau basa ngagai baginda ke mega tuai menua.
Menteri Utiliti enggau Telekomunikasyen Sarawak Dato Sri Julaihi Narawi madah, baginda bejalaika tanggungpengawa ke chukup besai ngagai menua tu sereta nyadi kelai penyerakup pupu bansa di Malaysia.
“Tu sebengkah ari penyelai Sarawak sebuah menua dalam Malaysia ti mandangka pangku pengawa Seri Paduka Baginda Yang di-Pertuan Agong nyadi Tuai Menua lambang penyelai penyerakup pupu bansa di menua kitai ti diuan bemacham etnik kelebih agi di Sarawak,” ku iya.
Iya madah munyi nya lebuh dirandau pemberita ba Pengerami Ngirup Teh Serimbai Ngintu Pengerami Hari Keputeraan Rasmi Kebawah Duli Yang Maha Mulia Seri Paduka Baginda Yang Di-Pertuan Agong Ke-17 di Dewan DeTAR, Universiti Malaysia Sarawak ditu, Hari Enam.
Iya madah baru, pengerami tu diatur ngambi rayat Sarawak ulih nemu enggau ngelala Kerabat Diraja sereta kereban ti dikena ba Istana Negara.
Yang di-Pertua Negeri Sarawak Tun Pehin Sri Dr Wan Junaidi Tuanku Jaafar enggau bini, Toh Puan Fauziah Mohd Sanusi bela ngerichah Pengerami Hari Keputeraan Rasmi Yang di-Pertuan Agong Sultan Ibrahim Renggat Negeri Sarawak.
Sama bisi datai maya nya, Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau bini, Puan Sri Datuk Amar Juma’ani Tun Tuanku Bujang, Sapit Premier Sarawak Datuk Amar Prof Dr Sim Kui Hian, Pemangku Sekretari Perintah Sarawak Datu Dr Muhammad Abdullah Zaidel, bala Sapit Menteri Sarawak sereta temuai dipebasa ke bukai.-EDISI UKAS
