Pengawa Mandangka Video 'Tuanku Payung Mahkota' Program Khas Pengerami Ngirup Teh Hari Keputeraan Agong Renggat Sarawak 2024
Disiarkan pada 07 Sep 2024
Sumber Berita: UKAS
KOTA SAMARAHAN: Pengawa mandangka video 'Tuanku Payung Mahkota' entara program khas ke bisi ba Pengerami Ngirup Teh beserimbai Ngintu Pengerami Hari Keputeraan Rasmi Kebawah Duli Yang Maha Mulia Seri Paduka Baginda Yang di-Pertuan Agong Ke-17 Renggat Sarawak 2024.
Pemandang video nengah skrin besai ba Dewan DeTAR PUTRA, Universiti Malaysia Sarawak (UNIMAS) ditu, Hari Enam, video khas ke dikeluar Opis Penabur (RTM) Sarawak udah mandangka singkang pengidup Sultan Ibrahim, baka lebuh baginda diada kena 22 November 1958, nyengkaum nikah enggau Seri Paduka enggau Raja Permaisuri Agong, Raja Zarith Sofiah kena 22 September 1982.
Bela dipandang video sepanjai 6 minit pengawa Sultan Ibrahim dichiri nyadi Sultan Johor kena 23 Januari 2010, Istiadat Angkat Sumpah sereta Nyain Surat Sumpah megai Pemangku Yang di-Pertuan Agong ke-17 kena 31 Januari ti udah, sereta Istiadat Pertabalan Sri Paduka di Istana Negara kena 20 Julai 2024.
Pengerami nya udah ngempuru urung lebih 500 temuai ti udah dipenyadika Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar sereta bini, Toh Puan Fauziah Mohd Sanusi.
Sama bisi datai maya nya Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sereta bini, Puan Sri Datuk Amar Juma'ani Tun Tuanku Bujang, Sapit Premier Sarawak Datuk Amar Professor Dr. Sim Kui Hian enggau Menteri Ultiliti enggau Telekomunikasyen Sarawak ke mega Menteri Beempu Tanggungpengawa Ngintu Pengerami Dato Sri Julaihi Narawi, Pemangku Sekretari Perintah Sarawak Datu Dr. Muhammad Abdullah Zaidel, Chairman Sarawak Information System Sdn Bhd (SAINS) Datuk Patinggi Tan Sri Dr. George Chan Hong Nam, Bala Sapit Menteri Beempu Tanggungpengawa Ngintu Pengerami sereta temuai dipebasa ke bukai.
Dulu ari nya, pengerami nya dipungkal enggau lagu 'Ibu Pertiwiku', lalu ditangkan pemerindang tanda ‘Selamat Datai’ ari Petra Dancers ba ari Kaunsil Seni Sarawak (MSS) sereta sembiang betuaika Imam Besai Negeri Sarawak, Dato' Mustapha Kamal Ahmad Fauzi.
Pengawa nya diterus enggau nyirsp pulut kuning ari Tun Pehin Sri Dr. Wan Junaidi sereta bini, dientudi pengawa mandangka video lagu khas ke disada Bob Yusuf enggau Camelia.
Lebuh pemakai dinah, bala temuai diperindang penyanyi ke udah dikangau baka Firdaus Materang, Hijrah Yahya enggau Valerie Thiam Mei Lee disempulang bala pemuzik ari MSS.
Ungkup rikod, Kota Samarahan udah nyadi tuai rumah Ngintu Pengerami Hari Keputeraan Rasmi Kebawah Duli Yang Maha Mulia Seri Paduka Baginda Yang di-Pertuan Agong Ke-17 Renggat Sarawak kediatur pengelama empat hari, berengkah 5 nyentuk 8 September 2024.
Bisi empat program besai nyengkaum pengawa Pemandang Raja Kita di Summer Mall Kota Samarahan, Pengawa Makai Selamat Pengarap Bukai di Dewan Suarah Kota Samarahan enggau Pengawa Makai Selamat di Masjid Al-Muttaqin Kota Samarahan.-EDISI UKAS
