Direktor Yayasan Sarawak Nerima Penemuai Basa Duta Besai Ireland
Disiarkan pada 06 Sep 2024
Sumber Berita: UKAS
KUCHING: Direktor Yayasan Sarawak, Mersal Abang Rosli udah nerima penemuai basa ari Duta Besai Ireland ke Malaysia, Orla Tunney, Hari Lima.
Pengawa nemuai nya diatur ba begunan Yayasan Sarawak ti ngembuan tuju berandauka pekara bekaul pelajar ke ulih mai pengelantang ngagai rayat enggau pengelantang ekonomi Perintah Sarawak enggau Ireland.
“Pengelama betaun tu, kami udah mayuh meranakka puku ba pekara rayat kami lalu diatu kami udah bisi sektor pelajar ti chukup tegap.
“Bisi berapa buah universiti ti nyulut, bisi mega nembiak ari Sarawak ke nampung belajar ba universiti kami.
“Kami meda sekumbang nya, rayat kami bisi pengandal, pengulih ba ekonomi, pia mega kami udah mujur matak mayuh agi pemeranak puku,” ku iya madah.
Iya madah munyi nya maya dirandau pemberita sepengudah berandau enggau Mersal ditu, Hari Lima.
Ku Orla madah baru, Sarawak ngembuan penemu ke sebaka enggau sida, iya nya meranakka puku ungkup rayat.
Sama bisi datai ba aum nya, Chairman Universiti Malaysia Sarawak (UNIMAS) Tan Sri Datuk Seri Panglima Sulong Matjeraie, Pemangku Sapit Direktor Watson Chunggat Leornard Doo, Pegawai Duta Ireland Anne Ganyang Liason, Penulung Direktor (Pekara Korporat enggau Undang-Undang) Jolly Marikan enggau Tuai Servis Pelajar ASEAN, Enterprise Ireland Jayanthi Thevarajah. -EDISI UKAS
