BINTANGOR: Sapit Menteri Pengeraja Asal Enggau Pemeruan Rampa Menua Dato' Sri Huang Tiong Sii nandu Pengawa Ngabang Hari Raya Aidilfitri ke Bintangor, Hari Satu tu tadi.
Iya ngabang ngagai Kampung Darul Falah Sungai Gemuan, Kampung Selemas, Tuai Kampung Abdul Rahman Wasli, Sapit Chairman Pbb Pampang Meradong Kr Samsawi Mohamad Enggau Ex-Tuai Raban Nembiak Pbb Pampang Meradong Khairuddin Qalam Daud.
Ngena awak nya iya beterima kasih ngagai rayat ke nyukung iya maya Pengawa Bepilih Besai (PRU) 2022 suba.
Iya ke mega Kaban Parlimen Sarikei besemaya deka gawa bebendar ngarika rayat di menua nya.
Maya nya mega, Dato Sri Huang bisi ngungkupka pemeri Ngagai Kampung Darul Falah, Sungai Gemuan, Kr Samsawi, Komiti Pemansang Enggau Pengelikun Genturung Pendiau (JKKK) Kampung Selemas Enggau Jkkk Surau Kampung Selemas.
Kelimpah ari nya, iya mega madahka diri deka ngaga palan engkah kerita ba mua Surau Kampung Selemas ngena Projek Program Transformasyen Menua Pesisir (RTP) 2024.-EDISI UKAS
