Pengerami Ngintu Hari Merdeka Nyungkak Ulah Taluk ke Menua
Disiarkan pada 06 Sep 2024
Sumber Berita: UKAS
PADAWAN: Pengerami ngintu Hari Merdeka ke diatur ba renggat Pelilih Mit Padawan tau bendar nyaup nyungkakka agi ulah taluk ke menua rayat Malaysia di Sarawak.
Sapit Residen Sitak Kuching, Bujang Rahman Seli madah, pengerami sekali tu dikena ngingatka pemeras bujang berani sereta bala tuai dulu suba ngetan pengelantang enggau pengelikun menua.
Iya madah munyi nya maya Pengawa Nutup Pengerami Ngintu Hari Malaysia 2024 renggat Pelilih Mit Padawan ke diatur ba Sekula Primari (SK) Pangkalan Ampat ditu, kena Hari Tiga tu tadi.
Ba pengerami nya mega Bujang diberi basa ngelai pengawa nyuaka menira Malaysia enggau Sarawak ngagai Tuai Raban Bansa Menua Biya, Chairman Gerempung Komuniti Pelilih Mit Padawan sereta Kepala Pengajar SK Pangkalan Ampat, Warren Bunsu.
Pegawai Pelilih Mit Padawan Julius Scott Sapong ti sama bisi datai maya nya bela madahka diri berasai temegah ati meda pemujur pengerami nya diatur di menua nya.-EDISI UKAS
