KUCHING: Nembiak Sarawak ke nampung pelajar di Asia Barat deka dibai pansut ari menua nya nyema majak enda likun.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Openg madah, pemutus bekaul pekara nya bepanggai ba penemu ari Opis Menteri Luar Nengeri enggau Opis Menteri Pelajar Tinggi.
Ku iya, tebal agi nembiak ari Sarawak belajar di Jordan enggau Mesir lebih agi ba Universiti Alexandria enggau Universiti Al-Azhar.
"Kitai agi nganti pemutus ari Opis Menteri Luar Nengeri bakani gaya menua nya din lalu nyema opis menteri nya enggau Opis Menteri Pelajar Tinggi madahka nembiak kitai patut dibai pulai, kitai deka nitih lalau sida," ku iya madah.
Iya bejaku munyi nya maya dirandau media udah ngulu Pengerami Ngabang Aidilfitri ke diatur Penyanding Penemu Opis Menteri Dagang Antarabansa enggau Pemeranak Puku Sarawak Dato Sri Mohd Naroden Majais ditu, Hari Dua.
Ba pekara bukai, Premier Sarawak madahka Perintah Sarawak benung ngelangkar kerejasama enggau Perintah Besai ba sektor berubat, pengerai enggau pelajar.
Ku iya, siti chara mayar pulai ari Perintah Besai udah digaga dikena ngemujurka kerejasama nya dipenyadi.
Iya ngarapka kerejasama nya deka berengkah dipejalai ujung taun tu alai iya mega madahka diri udah berandau enggau Sapit Menteri Pengerai Dato Lukanisman Awang Sauni, Hari Satu tu tadi.
"Kemari aku berandau enggau Sapit Menteri Pengerai lalu sida diatu udah bisi komiti ngaga chara ke ulih dikena kitai ngaga baru klinik.
"Nyema klinik patut diadu baru, kitai deka ngaga baru, belanja kitai mansutka dulu tang udah nya Perintah Besai deka mulaika puky nya baru," ku iya nerang.
Bekaul tusun tuai baru megai menua Singapura, Datuk Patinggi Abang Zohari madahka Perintah Sarawak nimbal manah pekara nya lalu andal kerejasama Singapura enggau Malaysia lebih agi enggau Sarawak mengkang ditanggam enggau manah.
Ku iya, kerejasama nya beguna bendar ba pekara kuasa enggau dagang dua buah menua.
Bela datai maya nya Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai), Datuk Sharifah Hasidah Sayeed Aman Ghazali, Kaban Parlimen Batang Sadong, Rodiyah Sapiee sereta temuai ke bukai. -EDISI UKAS
