LUNDU: Pengerami nyambut Gawai Dayak Renggat Pelilih Lundu taun 2024 deka diatur kena 22 Mei tu ila.
Pekara nya udah diputuska ba aum keterubah Pengerami Nyambut Gawai Dayak Renggat Pelilih Lundu 2024, Hari Satu tu tadi.
Chairman komiti pengerami ke mega Kaban Kunsil Nengeri (ADUN) Opar Billy Sujang madah, pengerami nya deka nyungkakka agi pemanah kaul pupu bansa di pelilih Lundu enggau Sematan.
Ba aum nya mega, pengerami diputuska dibagi ngagai dua segmen iya nya Pengawa Bejalai Bebala Mayuh Gawai Dayak Pelilih Lundu enggau Pengerami Makai Lemai Gawai Dayak Pelilih Lundu 2024.
Sekeda ari tuju pengerami diatur iya nya deka mandangka pemanah enggau pemayuh bansa main asal ke dikembuan pelilih nya.
Bela bisi datai maya aum nya, Pemangku Pegawai Pelilih Lundu Zulkipli Morshidi. -EDISI UKAS
