KUCHING: Pengawa ngaga Palan Latih Serakup Injinir Konsultan Bumiputera Sarawak (GJPBS) diatu ba renggat ngiga taba ti engkeman dikena ngaga projek nya.
Chairman (GJPBS), Ir. Irwan Zulkarnain Muhammad Hasbie madah, tuju palan latih nya digaga dikena meri latih ngagai injinir ari serakup nya sereta nyendia palan pemansik enggau makmal.
"Batang tuju kami deka netapka taba tu ngambika ulih nyadi palan latih dikena bala injinir, endur ngaga woksyop enggau seminar sereta ke bukai.
“Lalu kitai mega merambu ba palan latih tu ila bisi palan pemansik enggau makmal,” ku iya madah.
Iya madah munyi nya ngagai media sepengudah nemuai basa ngagai Premier Sarawak Datuk Patinggi (Dr) Abang Abdul Rahman Zohari Tun Datuk Abang Openg di Wisma Bapa Malaysia ditu, Hari Tiga.
Berebak enggau nya, Ir. Irwan madah, projek ngaga palan latih tu disadang berengkah pun taun 2026 sepengudah bulih pemendar.
“Diatu kitai meseti ngiga taba dulu lalu udah nya ngaga langkar, nganti pemendar ari opis bekuasa sereta pengawa bekaul ke bukai ti bekenaka timpuh abis nadai enam bulan ngagai setaun.
“Diatu udah taun 2024, engka taun 2025 baru kitai bulih pemendar lalu ujung taun 2025 tauka pun taun 2026 kita ulih berengkah ngaga palan latih tu,” ku iya.-EDISI UKAS
