Perintah Chakah Mantu Rayat
Disiarkan pada 04 Sep 2024
Sumber Berita: UKAS
KAPIT: Perintah semampai chakah nentuka agih belanja ke diberi chukup dikena nipak guna enggau peminta rayat.
Menteri Kereja Raya Dato Sri Alexander Nanta Linggi madah, tiap iti peminta tauka projek meseti nitih atur ti udah ditetapka perintah alai pengari rayat enda sepeneka nyadung agih belanja enggau pemeri ngagai rayat.
"Kami ke nyadi pengari rayat ditu deka nentuka Perintah Nengeri tauka Perintah Besai semampai mantu lalu meri agih belanja dikena numbuhka projek pemansang infrastruktur enggau ekonomi ungkup pengelantang rayat nyengkaum rayat di Kapit ditu.
"Nya alai, sukung ke tegap sereta kerejasama ari semua lebih agi rayat Kapit empu endang beguna ngagai kami," ku iya madah.
Iya bejaku munyi nya ba program Nyuaka Chek MRP enggau Pemeri UNIFOR ditu, Hari Satu tu tadi.
Ngena awak nya, Dato Sri Alexander ngelalau penerima ulih ngena pemeri ari perintah enggau manah sereta datai ba tuju.
Maya nya, iya nyuaka chek pemeri RM1,259,840 ngagai Sekula Primeri (SK) Sungai Menuan, SK Methodist, SK Sungai Amang, SK Nanga Mujong, SK Nanga Entuloh Kapit, SK Nanga Tiau enggau SK Lubok Mawang.
Pengawa nya bela digulu Sapit Menteri ba Opis Premier Sarawak (Undang-undang enggau Adat Bumiputera) ke mega Kaban Kunsil Nengeri (ADUN) Bukit Goram Datuk Jefferson Jamit Unyat, ADUN Pelagus Wilson Nyambong Ijang enggau ADUN Baleh Nicholas Kudi Jantai. -EDISI UKAS
