BETONG: Pengawa ngabang ngagai pangan diri maya hari besai tau bendar ngenegapka agi kaul sereta penyerakup enda ngira bansa enggau jalai pengarap.
Menteri Raban Nembiak, Lumba enggau Pemansang Dagang ke mega Kaban Kunsil Nengeri (ADUN) Layar Dato Gerald Rentap Jabu madah, penyerakup enggau kaul nya patut ditan awakka ulih mai pengelabih ngagai kitai ditu.
Iya mega madah, pengerami ti mujur tu ulih nyungkak enggau ngemansangka agi penumbuh ba menua tu.
“Taja mayuh penanggul bekaul bansa enggau jalai pengarap ba endur bukai, tang kitai di Betong ditu enda kala meda pekara nya nyadi isu.
"Maya pengerami baka tu, kitai sama bela ngabang ngagai pangan diri, nyema kitai ditapi penanggul, kitai mega sama bela mantu pangan diri enggau maya bisi penusah nyadi, kitai semampai sama besaup mutarka isu nya.
“Aku enggau Kaban Parlimen Betong deka semampai bejadika mayuh agi program perintah ti ulih mai pemansang ngagai rayat ditu baka ngemanahka infrastruktur, nyungkak pengawa bedaja tauka sosio-ekonomi menua tu,” ku iya maya dirandau raban media ba pengawa ngabang ngagai kampung Melayu beserimbai enggau Hari Raya Aidilfitri ditu, empai lama tu tadi.
Ba pengawa nya, iya ngabang ngagai Kampung Masjid, Kampung Tengah, Kampung Hilir, Kampung Baru Hulu, Kampung Baru Hilir enggau Kampung Pasar Melayu, Betong.
Nangkan nya, iya mega ngabang ngagai semilan buah rumah nyengkaum bala penghulu, tuai genturung pendiau enggau Tuai Parti Pesaka Bumiputera (PBB) di menua nya.
Iya bela disempulang bini iya Datin Rosemarie Wong, Kaban Parlimen Betong Dr Richard Rapu, Temenggong Kueh Tu Teck, Pemancha Norman enggau raban AJK Gerempung Tuai Rumah Layar ti diarika raban komuniti China enggau Iban sereta bala bukai.
Muakka lemai, Dato Gerald mega dipebasaka datai ngerichah Program Nyambut Hari Pengada Ke-100 Tokong Siang Ti Betong ti disempulang enggau mayuh macham program ngelingi Pasar Lama Betong.
Bisi 60 kontijen ti enggau ngulu pengawa bejalai bebala mayuh maya nya baka pengari ari tokong China sereta raban Gerempung Ukai Dikuasa Perintah (NGO) komuniti China ari menua Betong, Spaoh enggau Debak nyengkaum penyereta sida ari Kuching, Sri Aman, Engkelili, Saratok, Roban enggau Sibu. -EDISI UKAS
