JERIJIH: Perintah udah ngungkupka belanja RM20 juta dikena ngaga Projek Skim Nangkir Genturung Pendiau (SPK) di Jerijih.
Nerangka pekara nya Sapit Menteri Pengatur Mengeri, Tanah enggau Rampa Menua Sarawak Datuk Len Talif Salleh madah, projek ke udah lama tejanggal nya deka dipansik baru.
Iya madah, tu nyengkaum beratika pengulih nyungkur baru lot, nyendiaka perengkaguna baka jalai, karan enggau ai.
Ba SPK Jerijih nya ku iya, bisi 232 iti lot baru deka diungkupka ngagai peranak Kampung Jerijih ke udah nganjung peminta.
Iya bejaku munyi nya maya Pengerami Riang Ria Aidilfitri begulai enggau peranak Kampung Jerijih ba balai mensia mayuh Kampung Jerijih, Hari Satu tu tadi.
Pengerami maya nya bela digulu Kaban Parlimen Tanjong Manis Ir Yusuf Abd Wahab.
Kelimpah ari nya, Datuk Len mega madahka diri deka beratika taba baru endur ngaga projek balai mensia mayuh Kampung Jerijih ke baru ngambika ulih lengkas berengkah digaga.
Tu bepun ari taba ke dilanggur sebedau tu enda dikemendar Opis Tanah Enggau Survei. -EDISI UKAS
