KOTA SAMARAHAN: Bisi 14 pelatih udah mujur nembuka Program Pengelandik Semikonduktor ba Analog Integrated Circuit (IC) Design enggau Pemansang Mutar Nguji IC ti nyadi pemujur keterubah ditempa di Sarawak.

Menteri Pelajar, Inovasyen, enggau Pemansang Pengelandik Sarawak, Dato Sri Roland Sagah Wee Inn, muji inisiatif nya, madahka semua graduet deka diambi gawa sekalika SMD Semikonduktor tauka Melexis.

Ku iya, tu nyadi juluk ati SMD deka ngadaka 500 iku profesyenal semikonduktor manggai taun 2030.

"Aku muji SMD ketegal pengeransing sida ngepunka pengelandik semikonduktor nengah kerejasama MELEXIS enggau CENTEXS.

"Pengawa kita mungkal pemun ke tegap ungkup pemansang dudi hari industri semikonduktor di Sarawak lalu aku andal pengawa tu deka mulaika asil manah ba taun-taun ke deka datai," ku iya madah.

Iya bejaku munyi nya maya Pengerami Nutup Program Pengelandik Semikonduktor SMD Raban Keterubah di Akademi SMD, La Promenade ditu, Hari Satu.

Iya ke mega Chairman SMD Semiconductor ngansak kompeni bekaul perintah (GLC) bela bechuntoka pemujur enggau penyulut SMD ngemansangka pengelandik.

"GLC patut nyukung program-prgram baka tu ti nipak guna industri sida lalu disaup MEITD," ku iya madah baru.

Ba pengawa nya, Tuai Pegawai Eksekutif SMD, Shariman Jamil madahka 16 pelatih baru ari institusyen baka Universiti Malaysia Sarawak (UNIMAS), Universiti Teknologi Malaysia (UTM), Universiti Tun Abdul Razak (UTAR), Universiti Kuala Lumpur (UniKL), Universiti Malaya (UM) enggau Universiti Xiamen udah dipilih ari 124 peminta menua tu enggau 65 peminta ari menua bukai ungkup raban kedua ti deka belabuh ari 3 September 2024. -EDISI UKAS