KUCHING: Keterubah iya Festival Band enggau Orkestra Antarabansa Sarawak (SIBOFest) 2024 deka diatur empat hari ditu, berengkah 17 ngagai 20 September tu ila.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, pengerami ti berambaika jaku 'Muzik, Budaya enggau Kaul Bakih' tu diatur ba Sekula Sekondri Lodge lalu batang program pengerami diatur di Hotel The Waterfront Kuching.

"Lebih 200 iku penyereta pengemeran muzik, pengajar enggau raban bepelandik ba industri sereta 15 tutor ari Malaysia, Singapura enggau Jepun disadang ngambi bagi ba pengerami tu ila.

"Batang program pengerami iya nya Konsert Gala Finale ti diperindang pengemeran muzik menua enggau antarabansa sereta antarabansa nyengkaum At Adau, The Band Lab enggau 60 iku raban muzik tebilang Jepun, Aikodai Meiden High School Symphonic Band bela datai maya nya," ku iya madah.

Iya nerangka pekara nya ba aum media ditu, Hari Satu.

Nambahka jaku iya, Dato Sri Abdul Karim madah, SIBOFest 2024 diatur ukai semina ungkup raban pemuzik aja tang bela nuju mensia mayuh alai pengerami nya bisi disaup Opis Menteri Dagang Temuai, Industri Kreatif enggau Seni Pemerindang Sarawak (MTCP) nengah Turu Pengemuntang Program Pesaka Asal, Seni enggau Main Asal Sarawak.

Ku iya, pengawa nya bela ngembuan tuju deka mai bala penyereta enggau mensia mayuh nemu agi main asal ke dikembuan Sarawak.

Ke penemu mayuh, pengawa ngerejista ba SIBOFest 2024 diatu udah ditutup tang sida ti rinduka muzik ari serata dunya endang dikelaluka datai ba Konsert Gala Finale kenaka 20 September tu ila alai tikit tama ulih dibeli nengah laman web thebandlab.com/sibofest/.-Edisi UKAS