MIRI: Keresa lama berega beratus ribu ringgit enggi Sapit Menteri Ba Opis Premier Sarawak (Orang Gawa, Imigresen enggau Matau Projek) Datuk Gerawat Gala abis angus sepengudah rumah iya di Kampung Pa' Umor, Bario angus Hari Minggu empai lama.
Iya ke mega Kaban Kunsil Nengeri (ADUN) Mulu madah, Opis Bomba enggau Penyah Penusah Malaysia (JPBM) Sarawak diatu agi benung mansik pun penusah nyadi.
Ngenang penusah nya, ku iya, iya nadai dia maya penusah nyadi lalu semina datai lemai Hari Minggu nya.
“Nittihka pansik ari JBPM, penusah angus nya dipelaba bepun ari karan,” ku iya madah.
Iya nerangka pekara nya maya dirandau media udah Pengerami Nyambut Hari Raya Aidilfitri ke diatur Lembaga Amanah Kebajikan Melayu Miri (LAKMM) ditu, Lemai Hari Satu. -EDISI UKAS
