Jourdania Champion Pekit Futsal KASUS Pampang Tellian 2024
Disiarkan pada 01 Sep 2024
Sumber Berita: UKAS
MUKAH: Tim Unit Saberkas Jourdania udah dipadu nyadi champion ba Pekit Futsal Karnival Lumba Saberkas (KASUS) Pampang Tellian 2024, kena Hari Enam.
Pemujur manis nya dijapai pengudah ngalahka tim Unit Saberkas Tellian Laut (A) enggau skor 4-1 ba main kepenudi.
Berebak enggau nya, Tim Unit Saberkas Tellian Laut (B) udah mujur ngalahka tim Unit Saberkas Bandar Mukah ba penuduk ketiga enggau skor 7-2.
Pengerami ‘kick off’ ungkup main kepenudi enggau pengawa nyuaka perais udah dipenyadika pegawai ari Palan Servis Tellian N57, Jay Keram, ti ngarika Kaban Kunsil Nengeri (ADUN) Tellian Royston Valentine ba Gelanggang Futsal Kampung Tellian, kena Hari Enam.
Lebuh diandau pemberita, Royston madahka tuju KASUS tu diatur dikena ngerapit kaul entara unit Saberkas Tellian seraya negapka penyerakup sereta nyeliahka ari pekara negatif.
Ku iya, ulah volunteer ngatur aktiviti komuniti enggau aktiviti ke baka nya mega nyadi pelasat dikena nempa identiti diri dalam nempa personaliti nyadi tuai kelebih agi ba raban nembiak.
Ke penemu mayuh, bisi 16 tim udah bepekit nyengkaum Unit Saberkas Tellian Ulu, Unit Saberkas Sungai Pegeh A enggau B, Unit Saberkas Kampung Datuk A enggau B, Yusapet A enggau B, Unit Sabekas US3T A enggau B, Unit Saberkas Tellian Laut A enggau B, Unit Saberkas Pekala A enggau B sereta Unit Saberkas Jourdania.-EDISI UKAS
