Pekit Main Bol 7 Sepiak Nerenak Semangat Sayau Ke Menua
Disiarkan pada 01 Sep 2024
Sumber Berita: UKAS
SIMUNJAN: Gerempung Nembiak Kelka udah ngatur Pekit Bol 7 Sepiak beserimbai Pestabol Merdeka Kelka 2024 ba Sekula Primari (SK) Abang Man, kena Hari Enam.
Kaban Kunsil Nengeri (ADUN) Simunjan Awla Dris enggau bini iya, Napsiah Abang Kaderi udah limpang meda pekit kepenudi main bol sereta nyuaka perais ngagai bala pemenang.
Nitihka penerang, pekit tu berengkah diatur 17 Ogos lalu diatur kena nerenakka semangat sayau ke menua sereta ngerichah Hari Kebangsaan Ke-67.
Pekit bol 7 sepiak tu dibagi ngagai dua kategori iya nya kategori lelaki digulu 20 tim lalu kategori indu bisi lima tim.
Champion ungkup kategori lelaki udah diempu tim Indu Opis Polis Pelilih (IPD) Simunjan pengudah ngelaban tim CTTR (A) ti ditentuka nengah sipak penalti enggau skor 5-4.
IPD Simunjan udah mujur mai pulai mata duit sepenyampau RM400 sereta trofi enggau midul, lalu ba penuduk kedua diempu tim CTTR (A) udah nerima mata duit RM300 sereta trofi enggau midul.
Nangkan nya, ba penuduk lumur tiga enggi tim Sungai Apin FC udah mujur mai perais mata duit RM200 sereta trofi enggau midul.
Berebak enggau nya, Sally FC udah bulih gela champion ungkup kategori indu enggau mai perais mata duit RM400 sereta trofi enggau midul.
Ba penuduk kedua diempu tim PIBG SK Abang Man lalu ba penuduk ketiga diempu Gelik Ati FC udah nerima mata duit RM300 enggau RM200 sereta enggau trofi enggau midul
Sama bisi datai, Chairman Pestabol Merdeka Kelka 2024 ke mega Chairman Gerempung Nembiak Kelka Simunjan Kaunsilor Mohd. Khairul Arman Mohmad, Tuai Raban Nembiak Biak PBB Pampang Simunjan 3. Kaunsilor Mohammad Zaini bin Haji Morshidi enggau Tuai PBB Zon 4 Rangawan Rafendy Ariffen. -EDISI UKAS
