Pengerami Ngintu Hari Kebangsaan 2024 Kampung Sungai Lajim Mandangka Pemanah Kaul Komuniti
Disiarkan pada 01 Sep 2024
Sumber Berita: UKAS
KUCHING: Pengerami Hari Kebangsaan 2024 Renggat Kampung Lajim taukka dikelala enggau nama Kampung No.5, udah ngatur pengerami nya enggau penuh semangat sereta penyelai kediri empu, nyeremin pengelantang sereta pemanah kaul komuniti lokal.
Ba taun tu, pengerami ngintu ba renggat genturung pendiau udah ngaul semua serak komuniti, ari nembiak mit nyentuk orang tuai enggau bemacham aktiviti ke ngerinduka ati enggau kreatif.
Bisi siti program ke dianti bala iya nya nyadaka leka pelandai ke alai raban nembiak diberi peluang ngenataika leka pelandai enggau sulu jaku merdeka enggau penyayau ngagai menua.
Aktiviti nya mega ukai semina meransang kreativiti enggau pemerani bejaku ba mua mayuh, tang negapka penaluk ba raban penyereta enggau bala peninga.
Kelimpah nya, pekit ngias puding ti berambaika jaku kebangsaan bisi diatur sebagi ari siti program ke chukup penyelai ti ngaul penyereta tauka tim ngias puding enggau berambaika jaku kebangsaan ngena chura tambai Malaysia tauka elemen ke ngelai sejarah enggau budaya menua tu.
Pekit tu mega ngembuan tuju ngansah pengelandik nyumai enggau kreativiti, seraya nerenak penyayau ngagai menua nengah chara seni kulinari.
Berindik ari nya, bisi mega ngatur pekit ngaga patung mini Merdeka sebengkah ari aktiviti ke ulih matak mensia mayuh.
Bala penyereta diberi awak ngukir patung mini ke ngelai merdeka ngena kereban ke muntang diulih ke ngelingi genturung pendiau dia ke alai program tu mega dipeda ulih nerenak kaul kerejasama beraban enggau kreativiti kena ngasilka sebengkah pekara ti nyelai ngayanka semangat merdeka.
Enda tinggal mega, pekit karaoke lagu patriotik mega bisi diatur ngambi pengerami nya richah agi.
Ba program tu, pengawa ngintu Hari Kebangsaan 2024 ba renggat genturung pendiau ukai semina nyadi nalab mandangka kreativiti tauka semangat merdeka sereta kebangsaan, tang mega nnegapka kaul ati enggau semengat bebaik ba peranak genturung pendiau.
Nengah bemacham aktiviti ti ngerinduka ati sereta chukup reti dikearapka ulih nerenak asai temegah sereta sayau ke menua ba semua peranak genturung pendiau.
Sama bisi datai, Temenggong Sitak Kuching Abdullah Jamel, Penghulu Omar Ini, Tuai Raban Bansa Salmiah Muhi enggau Tuai Raban Indu Parti Pesaka Bumiputera Bersatu (PBB) Pampang Satok Salina Salleh. -EDISI UKAS
