200 Penyereta Ngulu Fun Run Community Merdeka
Disiarkan pada 01 Sep 2024
Sumber Berita: UKAS
KOTA SAMARAHAN: Bisi 200 penyereta udah ngulu program ‘Fun Run Community Merdeka’ besulu jaku 'We Love We Care' beserimbai Hari Kebangsaan Malaysia ke-67 ke diatur ba Dewan Perpaduan Taman Samarindah, Kota Samarahan, kena Hari Enam.
Program tu nyengkaum belanda penyauh 5 kilometer nengah sulu jaku merdeka ke dipasuk serap komuniti.
Tu ngembuan tuju deka nerenak komuniti ngambika seruran ngemeranka gaya idup ti pengerai kelimpah ulih narak penyedar ngagai komuniti bekerejasama nagang bemacham penanggul rama ba genturung pendiau ngambikm kandang endur diau nya seruran likun.
Chairman Kaunsil Mengeri Kota Samarahan, Dato' Peter Minos madah, kelimpah ari gaya idup bepengerai enggau nagang penanggul rama, program tu mega ngembuan tuju meransang pengerami ngintu bulan merdeka sereta nerenak ulah talukka menua dalam diri enggau nuat tambai Malaysia.
Iya mega ngarap, nengah program tu ulih nerenakka pengeransing komuniti mandangka pengerindu enggau penyayau ngagai menua nengah chara nuatka tambai Malaysia.
"Ngena peluang tu, aku meransang semua komuniti nuat tambai Malaysia ba semua premis nyengkaum rumah diri empu kelai kitai sayauka menua tu.
“Ulah talukka menua sereta penyayau ti tinggi ngagai menua nyadi kubu ngetan sereta nyamin pengelantang enggau pengelikun menua ngambi seruran diintu,” ku iya maya bejaku ba Pengerami Nutup Fun Run Community Merdeka.
Sama bisi datai, Sapit Chairman Kaunsil Perbandaran Kota Samarahan Muttalib Julaihi enggau Pemangku Sekretari Kaunsil Mengeri Kota Samarahan Gustian Durani. -EDISI UKAS
