TANJUNG MANIS: Perintah udah ngemendarka agih belanja RM20 juta dikena ngaga Skim Gempuru (SPS) di Tanjung Manis nengah Opis Pemansang Kayu Ramu Sarawak (PUSAKA) enggau RM15 juta agi dikena ngaga Kompleks Lumba Tanjung Manis nengah Opis Kaunsil Pelilih Matu Daro.
Sapit Menteri Pengatur Mengeri, Tanah enggau Rampa Menua Sarawak Datuk Len Talif Salleh madah, SPS nya diungkupka ngagai sida ari menua bukai ke deka diau mendam di Tanjung Manis.
Iya ke mega ADUN Kuala Rajang terang madah, projek nya deka bekenaka timpuh sebedau ulih berengkah digaga.
Datuk Len bejaku munyi nya maya Pengerami Riang Ria Aidilfitri ba balai mensia mayuh Tanjung Manis, Hari Satu tu tadi ti bela digulu Kaban Parlimen Tanjong Manis Ir Yusuf Abd Wahab.
Iya mega ngarapka Projek Kompleks Lumba Tanjung Manis bela ulih berengkah digaga enggau lengkas ketegal pemansang nya beguna bendar dikena nyungkak Program Lumba di Tanjung Manis enggau menua ke besemak. -EDISI UKAS
