Jiwa Merdeka’ Peransang Nempa Rebak Ti Bisi Pengandal & Maju
Disiarkan pada 31 Aug 2024
Sumber Berita: UKAS
SIBU: ‘Jiwa Merdeka’ diambi ari sulu jaku Hari Kebangsaan 2024 iya nya ‘Malaysia Madani - Jiwa Merdeka’ sebagi ari penyungkak dikena nempa rebak baru ti andal agi nyingkang maju agi.
Menteri di Opis Premier Sarawak, Dato Sri John Sikie Tayai madah, rebak kemaya hari ngembuan semangat ‘Jiwa Merdeka’ enda ulih dikeenggai agi sereta ulih napi pemar pansut ari zon ti lantang dikena ngemansangka diri empu, nengeri enggau menua Malaysia.
"Dalam konteks napi pemar kemaya hari tu, rebak ke ngembuan 'Jiwa Merdeka' deka seruran sedia nyingkang pansut ari zon pengelantang ti udah lama nyadi penekul mansang ke mua.
"Rebak ke ngembuan semengat enggau penegap ati sereta pengandal ke tinggi ba pengulih diri dikeandal ulih napi pemar, enda putus pengarap sereta seruran deka ngemanahka diri empu," ku iya nerang.
Iya madah munyi nya lebuh bejaku ba Pengerami Gempuru Hari Kebangsaan Renggat Sarawak 2024 ke diatur ba Dewan Canselor Tun Abdul Taib Mahmud Universiti Teknologi Sarawak (UTS) ditu, Hari Enam.
Sama ngulu pengawa gempuru nya, Yang di-Pertua Negeri Sarawak Tun Pehin Sri Dr Wan Junaidi Tuanku Ja’afar sereta bini Toh Puan Fauziah Mohd Sanusi enggau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sereta bini, Puan Sri Datuk Amar Juma’ani Tun Tuanku Bujang.
Kelimpah nya, Dato Sri John Sikie ke mega Menteri Beempu Tanggungpengawa Ngintu Hari Kebangsaan Renggat Sarawak 2024 bela madah, pengawa ngamatka merdeka patut ditemu semua raban, kelebih agi ba dunya dinamik kemaya hari tu.
“Penemu tu chukup nyata ti bekaul pemar dinamik globalisasyen ti dipeda nyadi sebengkah ari pekara nagang daya idup menua ngambika terus efektif ngetanka pengelikun sereta nyingkang ba mua.
"Taja pia, kemerdekaan sebengkah ari menua ti deka seruran nyamin enti rayat ngembuan semengat kemerdekaan sereta beserakup begulai ba penetap ati ngetanka kemerdekaan menua diri empu," ku iya nerang.
Ba pengerami ti sama, bemacham pengawa video bisi dipandang sereta pemerindang khas bekaul enggau perjuangan enggau semangat talukka bisi dibantaika dikena ngingatka rayat Sarawak kelebih agi kemerdekaan ke diasaika kitai diatu ukai pekara ti muntang tang ngaul pengawa berambunka nyawa ke enda ulih diganti.
Sama bisi datai maya nya, Sapit Premier Sarawak Datuk Amar Awang Tengah Ali Hasan, Menteri Industri Pemakai, Komoditi enggau Pemansang Wilayah Sarawak Dato Sri Dr Stephen Rundi Utom, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Menteri Pengangkut Sarawak Dato Sri Lee Kim Shin, Menteri Pelajar, Inovasyen enggau Pemansang Bakat Sarawak Dato Sri Roland Sagah Wee Inn, Sekretari Perintah Sarawak Datuk Amar Mohamad Abu Bakar Marzuki, Sapit Menteri Sarawak, Sapit Sekretari Perintah Sarawak (Perambu Ekonomi enggau Pemansang) Datu Dr Muhammad Abdullah Zaidel, Sapit Sekretari Perintah Sarawak (Operasyen) Datu Hii Chang Kee, Sapit Sekretari Perintah Sarawak (Atur Pengawa) Datu Buckland Bangik, Bala Tuai Opis sereta temuai dipebasa ke bukai.-EDISI UKAS
