MIRI: Mengeri Miri deka bisi siti agi pematak temuai lalu nyadi kelai baru enti Jematan Piasau udah tembu ila.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perintah Sarawak udah ngemendarka projek ngaga jematan kabel nya ti deka ngenyantilka Piasau, enda jauh ari Kampung Galau Piasau ngagai Marina Miri.
Ku iya, Jematan Piasau nya baka Jematan San Francisco-Oakland Bay enggau Golden Gate ti udah ditemu tebilang.
"Jematan tu mega nyadi kelai baru di mengeri Miri," pia ku iya maya Pengerami Ramah Tamah Lembaga Amanah Kebajikan Miri ditu, Hari Satu.
Nambahka jaku iya, Premier Sarawak mega madahka Miri udah nyikap diri deka nyadi mengeri endur ngelantangka ati ti majak ngerembai mansang kelimpah bisi palan pesaka asal ke dituku Gerempung Pelajar, Sains enggau Daya Idup Pertubuhan Bangsa-Bangsa Bersatu (UNESCO).
"Enti di Kuching kitai bisi Jematan Darul Hana lalu pia mega di Miri, bela bisi jematan 'ikonik'.
"Nama jematan tu empai ditemu tang kitai deka ngaga jematan dulu," ku iya madah baru.
Ba pengerami nya mega, empat kompeni korporat bela nyuaka pemeri tanggungpengawa rama korporat ngagai Lembaga Amanah Kebajikan Melayu Miri.
Pemeri nya nyengkaum ari Shin Yang Sdn Bhd sepenyampau RM50,000, Empayar Setia Sdn Bhd (RM30,000), Kencana Defence & Aviation Sdn Bhd (RM 15,000) enggau Samling Strategic Corporation (RM10,000).
Bela datai ba pengerami nya Yang di-Pertua Negeri Sarawak Tun Pehin Sri Dr. Wan Junaidi Tuanku Jaafar enggau bini, Toh Puan Fauziah Mohd Sanusi, Yang di-Pertua Dewan Negara, Datuk Mutang Tagal, Sapit Premier Sarawak, Datuk Amar Awang Tengah Ali Hasan, Menteri Pengangkut Sarawak, Dato Sri Lee Kim Shin, Menteri Utiliti enggau Telekomunikesyen Sarawak, Dato Sri Julaihi Narawi, Tuai Sekretari Politik ngagai Premier Sarawak, Fazzrudin Abdul Rahman sereta bala pemesai ke bukai.-EDISI UKAS
