Sarawak Pemungkal Ekonomi Hidrogen Di Rantau ASEAN
Disiarkan pada 29 Aug 2024
Sumber Berita: UKAS
SYDNEY: Chakah ngaul diri dalam ekonomi hidrogen ba Sarawak nyadi pemungkal global ba kuasa beresi entara menua ASEAN.
Ku Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, Sarawak diatu pemain besai ba Pelin Kuing Idar Kuasa Nasional Malaysia nengah pengawa ngemansang hab hidrogen gadung.
Ku iya, pengelebih tu diangkat berindik ari pengulih kuasa hidro ti besai di nengeri tu.
"Ekonomi baru sereta ngerinduka ati tu meri mayuh peluang meranakka puku, ari ngemansangka teknologi baru baka elektroliser enggau sel minyak ngagai kena ngaga sistem nyimpan kuasa sereta ngempunh guna dalam sektor pengangkut.
"Ba jaku aku apin lama rambau Forum Poland di Poznan, aku meri perati pemesai guna kerejasama global ti chukup beguna, polisi ke meri empas enggau inovasyen ti enda ngetu dalam nempa pengidup dudi hari ti meruan.
"Aku mega udah madah baka ni bon gadung enggau mayar antarabansa beguna endar dikena ngerumban pengawa ngena teknologi klimet ti mansang, mandangka chara pekara wang sebagi ari kunchi nyadi juluk kami ti meruan nyadi nyata.
Iya madah munyi nya lebuh bejaku ba mua mayuh rambau Forum Dagang ASEAN - Australia 2024 - 'The Powerhouse Of Green Economy In ASEAN' ba Palan Konvensyen Antarabansa (ICC) Sydney, Hari Empat.
Datuk Patinggi Abang Zohari nyemetak madah, Sarawak ukai semina ngemeranka kuasa ti meruan sereta ekonomi gadung aja, tang ransing deka nyapai pemansut beresi.
Tu nengah pengawa muai karbon sektor pemanchar tinggi dikena nentuka penumbuh ekonomi Sarawak nipakka tanggungpengawa ngagai rampa menua, ku iya nambah baru.
"Enggau meranakka puku ba hidrogen gadung enggau kuasa beresi, Sarawak dulu sesingkang ari industri asal baka minyak, gas enggau kayu.
"Juluk aku nyata, deka nambahka produktiviti ekonomi enggau ngurangka belanja."
"Ari nerima inovasyen enggau kuasa beresi, kitai naka ulih nentuka Sarawak nempa pengidup dudi hari ti mansang enggau penuh tanggungpengawa sereta nyadi chuan ti ditunda orang bukai.
Ku iya, Sarawak mega bisi maju agi ba Asia Tenggara lebuh ngaul diri dalam industri Nangkap, Ngena enggau Nyimpan Karbon (CCUS), nyentuk nyadi nengeri keterubah di Malaysia ngemendarka undang-undang ti nyukung industri enggau aktiviti bukai ti bekaul enggau karbon.
"Tu mandangka pengeransing ti tegap Sarawak nyapai juluk pemansut beresi sereta netapka takat ke patut dititihka menua bukai.
"Manggai taun 2030, kami nagit deka ngaga kuasa solar nyadi 12 peratus ari semua champur kapasiti kami.
"Tu ukai semina deka mantu kitai ngurangka bekau karbon tang mega meri pangka ngagai sektor kuasa ti meruan agi sereta manahka rampa menua," ku iya nambah.
Seraya enam pengelicha ke dikangau bela ngambi peluang bejuraika visyen ekonomi gadung ke udah dikenatai Premier Sarawak urung sejam.
Sida nya Direktor Zen Energy Profesor Ross Garnaut AC, Direktor Pemeruan enggau Global sereta Pekara Luar, Fortescue, Australia Bronwyn Grieve, Direktor NSW Circular Economy Innovation Network Profesor Veena Sahajwalla, Chairman Viva Energy Hon Robert Hill Ac, Chairman Enserv Holdings Thailand Jimmy Tanachat Porchana enggau Direktor Acclimate Partners, Brisbane Australia Luisa Cass.
Bela nyempulang Premier Sarawak iya nya Sekretari Perintah Sarawak Datuk Amar Mohamad Abu Bakar Marzuki, Sapit Menteri Kuasa enggau Pemeruan Rampa Menua Datuk Dr Hazland Abang Hipni, Sekretari Pekara Wang Sarawak Dato Sri Dr Wan Lizozman Wan Omar enggau Tuai Sekretari Politik Premier Sarawak Fazzrudin Abdul Rahman. - EDISI UKAS
