MIRI: Sarawak deka bisi siti agi pun penatai ekonomi nyema Gua Niah di Miri ditukuka nyadi Taba Pesaka Asal Dunya (UNESCO).
Sapit Menteri Pemansang Raban Indu Enggau Nembiak Mit Datuk Rosey Yunus madah, pekara nya dipeda ulih nyungkakka sektor dagang temuai ukai semina bepun ari penatai temuai menua bukai tang mega ari rayat menua tu empu mega.
“Tu ila deka meri empas lebih agi ngagai sektor ekonomi kitai nyengkaum sektor dagang temuai ukai semina ari menua luar aja tang ba menua kitai empu tu mega laban enda semua ulih datai ngelawa Gua Niah," ku iua.
Iya madahka pekara nya maya dirandau media ba Pengerami Ngabang Aidilfitri ke diatur iya ditu, Hari Satu.
Dua hari sebedau tu, Sapit Menteri Pengatur Mengeri, Tanah Enggau Rampa Menua Datuk Len Talif Salleh madah, naka ke diatu, pengawa milih Taman Negara Niah dituku diberi gela nya benung ba renggat kepenudi.
Ku iya, pengawa netapka pemutus kepenudi nya deka digaga di New Delhi, India bulan Julai tu ila.
Bekaul Pengerami Ngabang Aidilfitri Datuk Rosey nya, pengerami dirichah enggau Penatai Premier Sarawak Datuk Patinggi Tan Sri Dr Abang Abdul Rahman Zohari Tun Datuk Abang Openg enggau Bini Puan Sri Datuk Amar Juma'ani Tun Tuanku Bujang.-EDISI UKAS
