MIRI: Premier Sarawak, Datuk Patinggi Tan Sri Dr. Abang Abdul Rahman Zohari Tun Datuk Abang Openg enggau bini Puan Sri Datuk Amar Juma’ani Tun Tuanku Bujang nampung pengawa ngabang ngagai Pengerami Ngabang Hari Raya Aidilfitri di Miri, Hari Satu.
Keterubah, seduai ngabang ngagai pengerami nya ke diatur Sapit Menteri Raban Nembiak, Lumba enggau Pemansang Orang Dagang Datuk Dr Ripin Lamat.
Nangkan nya, seduai ngabang ngagai Sapit Menteri Pemansang Raban Indu, Nembiak Mit Enggau Pengelantang Komuniti Datuk Rosey Yunus enggau Ex-Kaban Kunsil Nengeri (Adun) Lambir, Dato Usop Wahab.
Udah dia, Premier Sarawak ngabang ngagai Temenggong Datuk Abdul Rahman Abang Fadzail sebedau ngabang ngagai Sapit Menteri Pengerai, Dato Lukanisman Awang Sauni.
Ba pengerami nya, Puan Sri Datuk Amar Juma’ani bisi nyuaka duit raya ngagai 33 iku nembiak ari Rumah Kebajikan Hamidah Yakub Miri.
Mensia mayuh maya nya dipeda enda muai awak betemu semak agi enggau tuai lumur satu Sarawak nya.
Malam tu legi, Datuk Patinggi Abang Zohari dipadahka deka ngulu Pengerami Ramah Tamah Lembaga Amanah Kebajikan Miri, Di Mega Hotel. EDISI UKAS
