SIBURAN: Kampung Pesang dipadu champion ba Pekit Pemeresi enggau Landskap Sungai ke diatur Opis Sungai-Sungai Sarawak begulai enggau Palan Servis PBB N.20 Tarat.
Enggau nya, Kampung Pesang bulih perais mata duit RM6,000.
Kelimpah ari nya, Kampung Tarat enggau Kampung Munggu Kopi dipadu ngempu penuduk lumur dua enggau lumur tiga bela ngempu perais mata duit RM4,000 enggau RM2,500.
Semua sida bela nerima tropi enggau setipikit.
Pengerami nyuaka perais dipenyadi Menteri Pelajar, Inovasyen enggau Pemansang Pengelandik Sarawak Dato Sri Roland Sagah Wee Inn, Hari Enam tu tadi.
Dato Sri Roland ke mega Kaban Kunsil Nengeri (ADUN) Tarat maya nya bela dipebasa ngelepaska anak ikan ba sungai di Kampung Pesang ke udah ditukuka komiti pengatur sungai ti beresi.
Bela datai maya nya Sekretari Politik ngagai Premier Sarawak, Damen Rejek, Kontroler Opis Sungai Sarawak Ding Tiew Wong, Residen Sitak Serian Caroline Cleophas Joseph, Chairman Opis Rampa Menua Sarawak John Rampai, Pegawai Pelilih Siburan Ranum Bari enggau Tuai Kampung Pesang Dony Nuong. -EDISI UKAS
