PADAWAN: Agih Belanja Projek Mit Menua Pesisir (MRP) sepenyampau RM40,000 udah diberi ngagai raban nembiak Kampung Annah Sadir.
Sapit Menteri Pengangkut Datuk Dr Jerip Susil madah, ari agih belanja nya, sepenyampau RM20,000 datai ari MRP taun 2024 enggau RM20,000 agi udah dikemandarka bagi taun 2025 dikena nyaup ngatur program sida nangkan tu ila.
Datuk Dr Jerip ke mega Kaban Kunsil Nengeri (ADUN) Mambong madah, gerempung nya semampai chakah ngatur program lumba ti ulih negapka kaul enggau pangan diri.
“Kelimpah ari ulih negapka kaul, tu mega ulih mantu nembiak nyeliah diri ngereja pengawa enda menuku baka dadah,” ku iya.
Iya nerangka pekara nya maya Pengerami Bejadika Pekit Main Bol 9 Sepiak Renggat Ke-5 ke diatur Raban Nembiak Kampung Annah Sadir, Hari Minggu tu tadi.
Nangkan nya, iya mega minta Komiti Pemansang enggau Pengelikun Genturung Pendiau (JKKK) begulai enggau Raban Nembiak Kampung Annah Sadir ngiga endur ke engkeman dikena ngaga kompleks lumba.
Ba pekit nya, bisi 32 iti tim main bol udah nganjung nama besemekih ba pekit Tropi Raban Nembiak Sadir Renggat Ke-5 tu ila.
Pekit nya diatur dikena nyidi pengelandik baru ngarika tim Kunsil Nengeri (DUN) Mambong besemekih ba pekit Tropi Prima Bidayuh 2024 ti deka diatur enda lama agi.
Sama bela datai maya nya Sapit Pegawai Tadbir Opis Pelilih Mit Padawan Mathieus Akin, Temenggong Bidayuh Sitak Kuching Atok Derop enggau Tuai Kampung Annah Sadir Bobby Ham William. -EDISI UKAS
