BEKENU: Projek Klinik Pengerai Sepupok Niah udah dikemendarka digaga nengah Rolling Plan Ketiga (RP3) iya nya ba renggat ngemansangka klinik nya.
Sapit Menteri Pengerai, Dato Lukanisman Awang Sauni madah, pengawa milih kuntriktor enggau ngepunka projek deka berengkah ari taun 2025 tu ila lalu disadang tembu dalam kandang 36 bulan.
Ku iya, Klinik Pengerai Sepupok ke diatu dibuka ba lot kedai di menua nya.
Iya nerangka pekara nya maya dirandau raban media ba Pengerami Nerima Pengabang Aidilfitri Sibuti ba Balai Mensia Mayuh Bekenu, Hari Enam tu tadi.
Dipelabaka bisi 1,000 iku mensia mayuh datai ngerichah pengerami nya ari pukul 10 pagi ngagai pukul 4 lemai.
Bemacham bansa pemakai dinahka ngagai bala mayuh ari Sibuti bisi datai ngerichah pengerami maya nya.
Sama bela datai ba pengerami nya, Sapit Menteri Pemansang Indu, Nembiak Mit enggau Pengelantang Komuniti (Pemansang Indu enggau Nembiak Mit), Datuk Rosey Yunus, Sapit Menteri Raban Nembiak, Lumba enggau Pemansang Orang Dagang Sarawak (Pemansang Orang Dagang Sarawak) Datuk Dr Ripin Lamat enggau Kaban Parlimen Miri, Chiew Choon Man. -EDISI UKAS
