KUCHING: Perintah Sarawak merambu deka ngaga siti agi penyangkai kapal baru iya nya di Tanjung Embang.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, naka ke diatu Kuching semina bepanggai ba Penyangkai Kapal Senari ti ngujungka penanggul sekut ba penyangkai kapal nya.
Nya alai ku iya, siti penyangkai kapal dilanggur deka digaga di Tanjung Embang ba tasik baka ke digaga di menua Jepun.
"Baka ke ditemu kitai Penyangkai Kapal Senari endang mit, alai kitai deka ngaga penyangkai kapal ke baru di Tanjung Embang.
"Tu enda digaga kitai ba tanjung tang digaga ba tasik," ku iya madah.
Iya madahka pekara nya maya Pengerami Ramah Tamah Aidilfitri Pelilih Gedong ditu, Hari Minggu tu tadi.
Datuk Patinggi Abang Zohari ke mega Kaban Kunsil Nengeri (ADUN) Gedong madah, pemutus ngaga penyangkai kapal nya ba tasik ketegal nyeliah pengawa numbak tebing tasik di menua nya.
"Ari nya kitai enda ibuh numbak tebing tasik ketegal penalam tasik udah chukup.
"Nyema tu udah tembu ila, penyangkai kapal tu deka disambung ngagai tebing tasik ditangkan ngelawa Kota Samarahan enggau Gedong," ku iya madah baru.
Iya andal, baka menua mansang Jepun enggau China ke udah mujur ngaga pengawa nya, nadai kebuah chara ke sebaka enda ulih dikena ngaga penyangkai kapal di nengeri tu.
Bela datai maya nya Sekretari Perintah Sarawak Datuk Amar Mohamad Abu Bakar Marzuki, Sapit Speaker Kunsil Nengeri (DUN) Sarawak ke mega ADUN Muara Tuang Dato Idris Buang, Sapit Menteri Pemansang Genturung Pendiau enggau Kandang Menua ke mega Kaban Parlimen Kota Samarahan Datuk Rubiah Wang, Sapit Menteri Utiliti enggau Telekomunikesyen Sarawak Datuk Dr Abdul Rahman Junaidi, Penyanding Penemu Opis Menteri Dagang Antarabansa, Industri enggau Pemeranak Puku Sarawak Dato Sri Mohd Naroden Majais, Kaban Parlimen Batang Sadong Rodiyah Sapiee, ADUN Simunjan Awla Dris sereta bala pemesai ke bukai.-EDISI UKAS
