PADAWAN: Agih belanja Projek Program Tranformasyen Menua Pesisir (RTP) sepenyampau RM400,000 udah dikemendar dikena ngaga baru balai mayuhguna Kampung Braang Bidak.
Berita manah nya udah dikunsi Sapit Menteri Pengangkut Sarawak (Langit Enggau Darat) Datuk Dr Jerip Susil rambau Pengawa Bejadika Jalai Ngelawa Ai Wong Sebarau kena Hari Enam.
Bela diatur serimbai pengawa malam nya netapka taba nirika balai mayuhguna baru nya.
Datuk Dr Jerip Ke Mega Kaban Kunsil Nengeri (ADUN) Mambong madah, Kampung Braang Bidak diatu bisi perambu pemansang ke deras dalam langgur timpuh panjai ke deka seruran dipejalai.
Ungkup napi pemansang, iya mega meransang rayat terus ngemansangka sektor betanam betupi enggau dagang temuai dia laban endur nya bisi pengulih besai ba sektor nya.
Dikena nyimpul jaku iya, Datuk Dr Jerip mega bisi nyuaka agih belanja RM500,000 ngagai Serakup Bidayuh Braang Padawan dikena nirika palan pedaja dia.
Ngenang pasal pengawa sehari nya ku iya, projek beungkus RM300,000 deka ngeranchakka agi aktiviti dagang temuai dia laban udah bisi jalai ke meruan ditengah orang luar enggau peranak dia empu.
Sama datai, Pegawai Tadbir Opis Pelilih Mit Padawan Julius Scott Sapong, Penghulu Bidayuh Sitak Braang Bengoh Tora Joseph, Tuai Komuniti Braang Bidak Burn Ambel sereta bala Tuai Raban Bansa Enggau Tuai Komuniti (Kmkk) Sitak Braang Bengoh.-EDISI UKAS
