LUNDU: Kaban Kunsil Nengeri (ADUN) Opar Billy Sujang udah datai ba pengawa kepenudi ngabas dua projek Program Transformasyen Menua Pesisir (RTP) ba sitak Kunsil Nengeri (DUN) Opar.
Projek nyeleti jalai kebun enggau pendam lama di Kampung Tanjam nya diatu udah ba renggat kepenudi.
Seraya projek kedua ti diabas iya mega projek nyeleti jalai kebun di Kampung Paon.
Tuju pejalai ngabas projek kena Hari Dua dikena beratika asil enggau kualiti projek sida kunteriktor ungkup pengelantang peranak menua nya.
Ba pejalai nya, Billy disempulang pegawai enggau raban Opis Parit enggau Entali Ai (DID) Bagi Menua Kuching. -EDISI UKAS
