KUCHING: Perintah Sarawak nengah Opis Menteri Utiliti enggau Telekomunikasyen Sarawak (MUTS) udah ngelala 10 iti seradak sungai endur nirika tekat ai hidro.
Menteri MUTS, Dato Sri Julaihi Narawi madah, seradak sungai ke udah dikelala sida nya ila deka dikemansang ngena teknologi pemadu baru lalu diangkat nyadi tekat ai hidro beringkat.
“Kami deka bekenaka teknologi pemadu baru enggau chara baru dikena nirika tekat ai nya ti nitih arus sungai.
“Kami mega udah ngelala 10 iti seradak sungai ke alai tiga ari nya udah diterang ngagai perintah Sarawak ungkup nirika tekat ai nya,” terang iya.
Iya nerangka pekara nya lebuh dirandau raban media ba Pengerami Nerima Pengabang Aidilfitri ti diatur iya ba endur diau ditu, sehari tu.
Dato Sri Julaihi mega madah madah, raban MUTS ila deka ngatur randau begulai enggau bala pegawai sereta bala pembesai pelilih menua nya bekaul chara sida ngaul komiti peranak menua nya ba projek tu ila.
“Kami deka ngaul raban komiti peranak menua tu begulai enggau opis menteri, Sarawak Energy Berhad (SEB), Opis Residen, Opis Pelilih nyengkaum bala pembesai ke bukai ba projek nya ila.
“Nya alai, kami deka meransang peranak menua tu sama ngaul diri ngemansangka tekat ai hidro beringkat nya ti betuaika SEB.
“Kebuah pia laban sistem mansut enggau transmisyen kuasa nya endang diempu enggau dikuasa sida SEB,” ku iya.
Tekat ai hidro nya dikena ngamatka juluk ati Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ke alai iya deka mansutka 10 Gigawatt kuasa manggai taun 2030.
Urung pukul 2 lemai tu tadi, Datuk Patinggi Abang Zohari enggau bini, Puan Sri Datuk Amar Juma’ani Tuanku Bujang mega udah ngabang ngagai Pengerami Nerima Pengabang Aidilftri ke diatur iya ba endur iya diau.
Sama bdatai ngerichah pengerami ngabang nya, dua Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian, Menteri Pengangkut Sarawak Dato Sri Lee Kim Shin, Menteri Industri Pemakai, Komoditi enggau Pemansang Wilayah Sarawak Dato Sri Dr Stephen Rundi Utom sereta bala pembesai ke bukai. - EDISI UKAS
