SIBU: Kampung Datu di Sibu deka diangkat baru nyadi genturung pendiau asal pemadu besai di Sarawak.
Premier Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg madah, genturung pendiau nya deka ditan penulin tang bisi pemansang ditambah.
Ku iya, kelimpah ari ngaga genturung pendiau nya moden agi, penteba budaya Kampung Datu enggau kandang ngelingi dia endang deka ditan.
“Tu ngambi kitai ulih mantaika penteba budaya ke semampai ditanka kitai ba Kampung Datu.
“Reti iya, ari Boulevard ke Masjid An-nur ngelawa tebing ai nya ila deka didirika kitai genturung pendiau enggau rumah moden. Enti sema Darul Hana nya ulih diaduka kitai, aku mega andal Kampung Datuk ulih didirika kitai,” ku iya.
Iya bejaku munyi nya lebuh dirandau ba Pengerami Ngintu Hari Raya Aidilfitri Bagi Menua Sibu, di Universiti Teknologi Sarawak (UTS) Sibu kena Hari Enam.
Berebak enggau nya, Datuk Patinggi Abang Zohari mega madah ke tebing ai Igan deka dikemanah baru enggau bisi penteba ke narit ati.
“Kitai deka ngelagu tebing ai nya enggau penteba ti ulih narit ari mensia mayuh baka nirika Palan Konvensyen dia.
“Tu ila ngambi kitai ulih ngaga palan bedaja moden agi ba genturung pendiau asal Sibu ti berimbai enggau Kemuyang sereta jalai alun sepemanjai 15KM.
“Ari Kemuyang ngagai Teku lalu ari UTS nyambung ngagai Kampung Datu. Nya alai, Kampung Datu tu deka ditangkir besai agi ngagai Kemuyang,” ku iya nambah.
Entara tuju pengawa numbuhka genturung pendiau nya dikena nempa penyerakup, pemereti ati, basa enggau ngerapitka kaul entara perayat asal Kampung Datu.
Nambah ke nya, pengawa nya mega nyadi pengari tauka jematan entara peranak enggau institusyen perintah, peribit enggau pemaju senentang penanggul ditapi peranak.
Sama datai Tuai Pemegai Menua Nengeri Sarawak Tun Pehin Sri Dr. Wan Junaidi Tuanku Jaafar sereta Toh Puan Fauziah Mohd Sanusi, Menteri Kereja Raya Malaysia, Dato Sri Alexander Nanta Linggi, Menteri Dagang Temuai, Seni enggau Budaya Malaysia, Dato Sri Tiong King Sing, Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah, Sapit Menteri Pelajar, Inovasyen enggau Pemansang Bakat (Pelajar Tinggi Enggau Inovasyen), Datuk Dr. Annuar Rapa'ee, Kaban Kunsil Nengeri (Adun) Tupong ke mega Tuai Sekretari Politik Premier Sarawak, Fazzrudin Abdul Rahman sereta temuai dipebasa ke bukai. -EDISI UKAS
