Tun Pehin Sri Dr Wan Junaidi Disadang Datai Ngerichah Pengerami Hari Kebangsaan Renggat Sarawak 2024
Disiarkan pada 19 Aug 2024
Sumber Berita: UKAS
KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar sereta bini Toh Puan Fauziah Mohamad Sanusi disadang datai ngerichah pengerami ngintu Hari Kebangsaan Renggat Sarawak 2024 di Sibu kena 31 Ogos tu ila.
Pengerami Hari Kebangsaan Renggat Sarawak 2024 ngena sulu jaku "Jiwa Merdeka" deka diatur ba Sibu enggau tiga batang program berengkah 30 nyentuk 31 Ogos 2024.
Menteri ba Opis Premier Sarawak, Dato Sri John Sikie Tayai madah, milih Sibu nyadi tuai rumah ngintu Hari Kebangsaan Renggat Sarawak chukup engkeman ke alai rayat Sarawak semampai begulai enggau lantang enda ngira bansa enggau pengarap.
"Pengerami Hari Kebangsaan Renggat Sarawak 2024 deka diatur ba Sibu, wilayah tengah ke alai semua raban bansa bisi dia, pia mega bala tuai raban bansa sereta komuniti ari pupu etnik ngambi pengerami kitai tu richah agi," ku iya.
Iya madah munyi nya lebuh dirandau media pengudah pengawa penemuai basa ngagai Sri Dr Wan Junaidi di Astana Negeri Sarawak, kena Hari Satu.
Berebak enggau nya, bisi tiga program besai deka diatur dikena ngerichah pengerami ngintu Hari Kebangsaan tu ila.
Entara program nya Konsert Mantar Hari Kebangsaan kena 30 Ogos berengkah 8 malam, enggau program Fun Walk muak ke pagi 31 Ogos dipelaba deka digulu 5,000 penyereta ke diatur ba Dataran Tun Tuanku Haji Bujang Sibu.
Nangkan nya, program Begelumu Ngintu Hari Kebangsaan deka diatur ba Dewan Canselor Tun Abdul Taib Mahmud, UTS Sibu deka diisi enggau pemerindang main asal sereta pemerindang khas lagu patriotik ari artis Sarawak enggau artis tebilang lokal ke bukai.
Sama bisi datai ba penemuai basa nya , Sapit Menteri Perambu Mengeri, Pengatur Tanah enggau Rampa Menua Datuk Len Talif Salleh, Direktor Pekara Protokol, Adat enggau Pengatur Program Sarawak (UPPANS) Hamdan Sharbini, Direktor Unit Komunikasi Awam Sarawak (UKAS) Samuel Simon, Residen Bagi Menua Sibu Abang Mohamad Porkan Abang Budiman sereta Sapit Residen Bagi Menua Sibu Christopher Ranggau Unting. -EDISI UKAS
