Main, Adat & Pesaka Asal Dayak Patut Ditan
Disiarkan pada 16 Aug 2024
Sumber Berita: UKAS
SIBU:Bansa Dayak dipinta mandang main, adat enggau pesaka asal sida ngagai bansa bukai.
Kaban Kunsil Nengeri (ADUN) Katibas, Lidam Assan madah, bansa Dayak patut nentuka semua nya mengkang bisi ungkup rebak dudi.
"Pajakka pengawa mandang main enggau pesaka asal kitai ngambika enda punas," ku iya.
Iya bejaku munyi maya ngarika Sapit Premier Sarawak, Datuk Amar Douglas Uggah Embas bejadika Panggau Malam Dayak Pengerami Mantai Main Asal Borneo (BCF) 2024 ditu, Hari Empat tu tadi.
Nambahka jaku iya, Lidam madah, pengawa mantaika main enggau pesaka asal Dayak siti chara ke engkeman dikena meransang sereta sayau ke adat asal enti dibanding semina dipeda ngena aplikesyen media rama aja.
Dulu ari nya, Tuai Pengatur Panggau Malam Dayak BCF 2024, Kaunselor Augustine Merikan madah, BCF siti pengerami ti besai di Sibu ke berengkah betikas mit aja ba taun 1990 suba.
Ku iya, BCF mega ukai semina disambut Dayak aja tang bela dirami Cina, Melayu enggau Melanau mandangka main asal diri.
Bela datai maya nya, Chairman Kaunsil Mengeri Sibu, Clarence Ting Ing Horh enggau Sapit iya, Kaunselor Mohammed Abdullah Izkandar Roseley sereta Temenggong, Stanley Geramong Bandar. -EDISI UKAS
