KUCHING: Atlit tuai rumah Lumba Malaysia (SUKMA) Ke-21, Nur Hazirah Ramli dipadu ngempu midul emas ba main tenpin boling kategori indu siku ke diatur di Megalanes Sarawak, Batu Kawa ditu, Hari Empat tu tadi.

Atlit beumur 21 nya kala bulih penuduk lumur dua kategori individu SUKMA 2022 suba.

Maya dirandau, iya madahka diri berasai gaga ati ke pemujur nya alai tu mega kepenudi iya enggau lumba dua kali setaun nya.

"Pemujur tu dituju aku ngagai semua penyukung, jurulatih, kami sebilik sereta bala bakih. Tu mega dituju aku ngagai sida ke semampai meri aku peransang.

"Aku mega ngarapka ulih bemain ba Junior All Stars dudi hari ila," ku iya.

Dulu ari nya, iya nerima midul nya ari Sapit Menteri Raban Nembiak, Lumba enggau Pemansang Orang Dagang Sarawak, Dato Gerald Rentap Jabu.

Penuduk lumur dua diempu atlit Selangor, Adania Mohd Redzwan lalu atlit Wilayah Persekutuan, Haiffa Hazlan ngempu penuduk lumur tiga

Ba kategori lelaki, atlit Terengganu, Wan Muhammad Zarif Ikram Wan Malan ngempu gela champion.

Penuduk lumur dua diempu atlit Wilayah Persekutuan, Shaqeem Izwan Teh enggau atlit Sabah, Emmanuel Fo ba penuduk lumur tiga. -Edisi UKAS