KUCHING: Atlit wushu Sarawak, Stephanie Ngu Chai Ern udah bulih tiga midul emas ditujuka iya ngagai jurulatih enggau apai indai iya ke semampai ngembing sereta meri peransang ari suba.

Empai lama tu tadi, Stephanie sekali agi udah mujur bulih 9.606 puin enggau midul emas ungkup kontinjen tuai rumah nengah kategori qianshu indu.

Menteri Raban Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah udah datai nyuaka perais ngagai pemenang.

Maya bejaku enggau media pengudah pekit nya, Stephanie madah, pemujur nya endang bepun ari saup jurulatih sereta bala iya ke udah beri pengandal ngagai iya kenyau umur 12 taun.

"Aku cukup temegah ati ngagai 'jurulatih' sereta apai enggau indai aku, lalu pia mega bala penyukung Sarawak ke udah meri peransang ngagai aku.

"Ketegal semua nya, aku ulih ngaga pemadu manah ba SUKMA tu," ku iya.

Sebedau tu, Stephanie madahka iya empai kala meri midul emas ngagai Sarawak enggau jurulatih iya, Lau Hui Wei kenyau lapan taun ke udah.

Penyulut sekali tu chukup besai reti ngagai iya nempa mujur ba semua kategori jianshu, changquan enggau ke pemadu baru iya nya qianshu..-EDISI UKAS