Premier Sarawak Dikangau Bekunsika Penemu Kuasa Gadung Di Hong Kong
Disiarkan pada 14 Aug 2024
Sumber Berita: UKAS
MUKAH: Premier Sarawak Datuk Patinggi Tan Sri (Dr) Abang abdul Rahman Zohari Tun Datuk Abang Openg madahka iya bisi dikangau bekunsika penemu bekaul kuasa gadung di Hong Kong ti mandangka pengawa Sarawak ngemansangka sektor nya dibasa dunya.
Ku iya, pekara nya bela ngelai Sarawak majak dikelala mayuh.
“Aku berasai gaga laban udah nerima kangau ari Hong Kong meri penemu bekaul enggau chara baru ba pemansang kuasa gadung.
“Dunya diatu udah berengkah ngelala Sarawak nengah pengawa tu,” ku iya maya bejaku ba Pengerami Makai Lemai Pemesai Begulai Enggau Rayat ditu, kena Hari Dua tu tadi.
Kelimpah ari nya, ku Datuk Patinggi Abang Zohari, iya berasai temegah ati laban udah dikangau menua bukai bekunsika penemu Sarawak ngereja ekonomi baru nyengkaum kuasa gadung.
Menua bukai ti udah ngangauka iya bekunsika penemu baka Poland, Belanda, Thailand, Singapura lalu minggu tu iya mega disadang nemuai ngagai Sydney, Australia.
“Basa tu nyengenda mandangka penyulut Sarawak nyadi pemungkal ba rantau tu bekaul kuasa gadung lalu ngenegapka agi penuduk Sarawak ba renggat antarabansa," ku iya madah baru.
Sebedau pengerami lemai nya, Datuk Patinggi Abang Zohari dibai ngabas Tebing Sungai Balingian.
Ku iya, pemeras perintah nengeri ngemansangka endur nya tauka ngaga Waterfront Balingian nyadi palan ke ditapat temuai di pasar Balingian.
Sama bisi maya nya Menteri Pemansang Indu, Nembiak Mit enggau Pengelantang Komuniti Sarawak ke mega Kaban Kunsil Nengeri (ADUN) Dalat Dato Sri Fatimah Abdullah, Menteri Pelajar, Inovasyen enggau Pemansang Pengelandik Dato Sri Roland Sagah Wee In, Menteri ba Opis ke mega Kaban Parlimen Mukah Dato Hanifah Hajar Taib, Sapit Menteri Utiliti enggau Telekomunikasyen (Telekomunikasyen) Datuk Liwan Lagang, Sapit Menteri Pemansang Mengeri, Pengatur Tanah enggau Pengeraja Asal Datuk Len Talif Salleh, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Sapit Menteri ba Opis Premier Sarawak (Undang-undang, Kaul Nengeri-Perintah Besai enggau MA63) Datuk Sharifah Hasidah Sayeed Aman Ghazali, Sapit Menteri Ba Opis Premier Sarawak (Pekara Pengereja Pengawa, Imigresyen enggau Matau Projek) Datuk Gerawat Gala,Sapit Sekretari Perintah Sarawak (Perambu Ekonomi Enggau Pemansang) Datu Dr. Muhammad Abdullah Zaidel, Sapit Sekretari Perintah Sarawak (Adminstration) Datu Buckland Bangik, Tuai Sekretari Politik ngagai Premier Sarawak ke mega ADUN Tupong, Fazzruddin Abdul Rahman, ADUN Tellian, Royston Valentine, ADUN Balingian Abdul Yakub Arbi, ADUN Daro Safiee Ahmad, Residen Sitak Mukah Kueh Lei Poh sereta bala pemesai ke bukai.-EDISI UKAS
