MARUDI: Pengawa ngabang maya hari besai endang dikemeran rayat enda ngira bansa enggau jalai pengarap di Sarawak.
Sapit Menteri Pengerai Mensia Mayuh, Pengawa Berumah enggau Perintah Menua Sarawak Datuk Dr Penguang Manggil madah, baikka Taun Baru China, Hari Raya, Gawai Dayak tauka Krismas, hari besai nya dirichah enggau pengawa rayat ngabang ngagai pangan diri.
"Ari tu kitai ulih negapka agi kaul pengari rayat, tuai genturung pendiau enggau genap iku rayat ke bukai," pia ku iya.
Iya bejaku munyi nya maya ngabang Hari Raya Aidilfitri di pelilih Marudi, Hari Empat tu tadi.
Iya ke mega Kaban Kunsil Nengeri (ADUN) Marudi madah, pengidup lantang rayat pupu bansa enggau jalai pengarap siti pengelebih nyadi di nengeri tu.
"Rayat kitai rindu begulai enggau pangan diri nyambut tiap bengkah ari besai," ku iya madah baru.
Bela enggau ngabang maya nya Pemangku Pegawai Pelilih Marudi Rose Edward Tarang enggau Chairman Opis Kaunsil Pelilih Marudi Kaunselor Edward Mendai. -EDISI UKAS
