KUCHING: Perintah Sarawak deka ngembuan serikat penerebai kediri ti disadang bejalai ba taun 2025.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa deka ngembuan serikat penerebai kediri empu nya diatu agi ba renggat teknikal.
Ku iya, pekara nya udah nerima pemendar ari Komiti Besai Penerebai Malaysia (MAVCOM), Opis Menteri Pengangkut enggau ‘Malaysian Aviation Group’ (MAG) naka ke diatu.
“Diatu semina pekara teknikal aja agi, engka bulan lapan tauka ujung taun tu baru pekara nya disadang tembu diatur.
“Enti sema nadai penanggul, kitai deka ngempu serikat penerebai kitai kediri empu ba taun 2025 ila,” ku iya.
Iya nerangka pekara nya maya dirandau raban media ba Pengerami Nerima Pengabang Hari Raya Aidilfitri 2024 ba Palan Konvensyen Borneo Kuching (BCCK) ditu, Hari Empat.
Nyaut tanya ari raban media bekaul model enggau nama serikat penerebai nya, Datuk Patinggi Abang Zohari madah pekara nya udah bisi tang apin ulih dipadah ngagai rayat naka ke diatu.
“Model enggau nama serikat nya ila deka dipadah aku ngagai semua enti sema semua pekara tu teputar ila,” ku iya.
Dulu ari nya, iya enggau bini iya, Puan Sri Datuk Amar Juma’ani Tuanku Bujang udah datai di BCCK ba hari kedua pengerami nya ti digulu 10,814 iku pengabang di Sarawak. - EDISI UKAS
