KUCHING: Perintah Sarawak semampai meratika sektor pengerai enggau pelajar ngagai rayat nengeri tu lebih agi dikena ngemansangka perengkaguna ti enda manah agi ba sektor nya.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perintah Sarawak deka ngagihka belanja dikena nyeleti perengkaguna sektor nya taja mayar ngena belanja ari perintah nengeri dulu.
“Enti sema Sarawak ulih mantu perintah besai, kitai ulih ngena dulu belanja nya.
“Kebuah pia, kami deka meri pengelantang ngagai rayat baka bisi sekula, klinik enggau meri servis ti manah ngagai rayat di nengeri tu,” ku iya.
Iya nerangka pekara nya maya dirandau raban media pengudah tembu Pengerami Nerima Pengabang Hari Raya Aidilfitri 2024 ba Palan Konvensyen Borneo Kuching (BCCK), sehari tu.
Datuk Patinggi Abang Zohari mega madah, perengkaguna ti enda manah agi deka diseleti nyengkaum nyedia alai pegawai enggau orang gawa ba kendedua sektor nya.
“Pengawa tu meseti digaga berumban baka klinik ti nyengkaum nyedia kuarters pengawai tauka indu misi enggau sekula mega baka kuarters baru alai bala pengajar diau,” ku iya nambah baru.
Ba bulan March nyin tadi, Menteri Besai Dato Seri Anwar Ibrahim udah ngemendarka meri kuasa ngagai Perintah Sarawak mayar dulu pengawa nyeleti perengkaguna ba sektor pengerai enggau pelajar ba nengeri tu alai Perintah Besai ila deka mayar baru belanja nya.-EDISI UKAS
