KUCHING: Pengerami Nerima Hari Raya Aidilfitri Premier Sarawak hari kedua sehari tu majak ditapat ke mensia mayuh ba Palan Konvensyen Borneo Kuching (BCCK) ditu.
Mensia mayuh udah datai tumu kenyau ari pukul 9 pagi tadi taja pengerami nya belabuh pukul 10 pagi.
Nangkan nya, mensia mayuh mega enda masau peluang berandau enggau ngambi gambar begulai enggau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sereta bini iya, Puan Sri Datuk Amar Juma’ani Tun Tuanku Bujang.
Sama bela datai ba awak nya, Yang Di-Pertua Dewan Negara, Senator Datuk Mutang Tagal, Sapit Sekretari Perintah Sarawak (Pengatur Ekonomi enggau Pemansang), Datu Dr Muhammad Abdullah Zaidel, Tuai Sekretari Politik ngagai Premier Sarawak Fazzruddin Abdul Rahman, Kaban Kunsil Nengeri (ADUN) Bukit Semuja, John Ilus, ADUN Beting Maro, Razaili Gapor, Datuk Bandar Kuching Utara (DBKU), Hilmy Othman.
Pengerami nerima pengabang nya dirichah Premier Sarawak ti digulu temuai dipebasa ke bukai merindang mensia mayuh belagu enggau dinah pemakai lokal Sarawak baka Laksa Sarawak, Mi Kolok sereta pemakai ke bukai.
Ba hari keterubah, pengerami nya mega udah nerima penatai urung 13,000 iku pengabang. -EDISI UKAS
