AUSTRALIA: Diligit Perintah Sarawak ti betuaika Sapit Premier Sarawak Datuk Amar Awang Tengah Ali Hasan udah ngatur pejalai ngagai Terumbu Sawar Besai enggau taba ngintu jelu siga tebilang di Queensland, Australia.
Batang tuju penemuai nya deka mansik pengawa ngintu marin enggau dagang temuai ti meruan ti ulih engkeman nitihka konteks rampa menua Sarawak.
Sebedau tu, raban diligit nya udah nerima penerang ari raban biologi marin lokal bekaul enggau strategi nyaga terumbu ke udah diatur ba Terumbu Sawar Besai, ba sebuah Palan Pesaka Dunya UNESCO.
Tuju nya deka meri penerang ke nyemetak agi bekaul enggau integrasyen pengawa ngintu marin sereta dagang temuai dikena ngelakuka pengawa nyaga rampa menua seraya disukung ekonomi ti ngelingi.
Raban diligit nya mega udah ngabas ngagai Taman Buaya Taman Buaya Marineland Melanesia ke tebilang kena ngintu baya pemadu besai di dunya ke dikurung.
Orang ke ngempu endur, Toddy udah meri penerang ke silik bekaul enggau pengawa ngintu baya ba dia ke alai iya ngemeratka pemesai guna ngintu jelu siga enggau dagang temuai sereta ngaul komuniti.
Nangkan nya, Datuk Amar Awang Tengah enggau raban nya nemuai ngagai Hartley’s Crocodile Adventures’ betemu enggau pengari Opis Rampa Menua, Sains enggau Inovasyen (DESI) Queensland.
Pengawa nya nyengkaum pengawa ngintu baya ke inovatif sereta nyerungkai peluang ungkup produk baya, ngemeratka pengulih pemansang ekonomi meruan nengah chara ngena pengeraja asal enggau tanggungpengawa.
Ari semua pengawa nemuai nya, ku iya meri penemu ke chukup berega ba pengawa ngintu sereta dagang temuai ke meruan ti ulih meri inspirasyen ngagai inisiatif Sarawak.
Pia mega, pengawa nemuai nya mandangka pengeransing menua Sarawak ngemeratka chara pemadu manah ba dunya ba pengawa ngatur pengeraja rampa menua sereta pemansang ti meruan.
Sama bisi datai maya nya Sapit Menteri Perambu Mengeri, Pengatur Tanah Enggau Rampa Menua Sarawak Datuk Len Talif Salleh, Sekretari Pekara Wang Sarawak Dato Sri Dr Wan Lizozman Wan Omar, Luyar Besai Sarawak Datu Saferi Ali sereta bala pegawai kanan perintah nengeri.-EDISI UKAS
