Sarawak Nagit Pengawa Betupi Kambin Nambah 25 Peratus Manggai Taun 2030
Disiarkan pada 10 Aug 2024
Sumber Berita: UKAS
LAWAS: Perintah Sarawak nengah Opis Menteri Industri Pemakai, Komoditi enggau Pemansang Wilayah (M-FICORD) ngembuan juluk deka nambahka pengawa nupi kambin di wilayah tu nambah 25 peratus manggai taun 2030.
Sapit Menteri nya, Datuk Dr Abdul Rahman Ismail madah, Sarawak bisi ngembuan Stesyen Meragang ditu ti nupi sereta mansut asil tupi kambin pemadu besai.
Ku iya madah, Stesyen Meragang diatu udah bisi urung 11,000 ke 12,000 iku lalu penyampau tu ditagit nambah ngagai 25,000 ngagai 30,000 iku manggai taun 2030.
Iya madah munyi nya maya pengawa Pemandang Betanam Betupi, Hortikultur enggau Agro Dagang Temuai Malaysia (MAHA) 2024 di Lawas, kena Hari Empat tu tadi.
Pengawa pemandang nya bela digulu Menteri Betanam Betupi enggau Pengelikun Pemakai Datuk Seri Mohamad Sabu.
Dikena nyapai juluk nya, Datuk Dr Abdul Rahman madahka Perintah Sarawak deka nempa stesyen nupi kerebau nyadi peribit begulai enggau jelu tupi bukai baka chapi enggau kambin.
Ngelansa bekaul pemansang Stesyen Meragang nya, iya madahka Perintah Sarawak udah ngemendarka agih belanja sepenyampau RM16 juta kena numbuhka kilang cheese pemadu baru udah 75 peratus tembu.
Sama bisi datai iya nya Kaban Parlimen Lawas Dato Henry Sum Agong, Tuai Sekretari Opis Menteri Betanam Betupi enggau Pengelikun Pemakai Malaysia
Datuk Lokman Hakim Ali, Direktor Opis Veterinar Sarawak Datu Dr Adrian Susin Ambud, Direktor Wilayah Agensi Pemansang Wilayah Utara (NRDA) Datu Ubaidillah Abdul Latif, Pegawai Pelilih Lawas Ladin Atok enggau Sekretari Politik Premier Sarawak Dato Pengiran Jawa. -EDISI, UKAS
